fbpx

Tralo establecemento do estado de emerxencia no país e a imposición das autoridades a que nos quedemos confinados en casa por precaución, hoxe abro este fío para poder aportar e sumar nesta situación, a través do entretemento, a cultura e a educación.

Programa Alalá

Programa indispensábel para coñecer a nosa música e a relación coa vida cotiá dos protagonistas, xa que a nosa música está ligada á vida rural. Neste aspecto, a documentación realízase in situ, o que permite retratar con maior fidelidade a vida musical galega tradicional.

A gaita galega

O programa «Naqueles Tempos» realizou un documental  dividido en tres capítulos, onde se fala da historia da gaita galega dende a súa posible orixe ata os anos 90. O documental conta coa participación de etnomusicólogos, investigadores, e artistas de renome.

Os instrumentos tradicionais Galegos

Gravación da mostra de patrimonio cultural inmaterial Galego-Portugués onde Pablo Carpintero fai un percorrido polos instrumentos tradicionais galegos.

Audiovisual didáctico de gaita galega online

O gaiteiro e frautista Santiago Molina, afincado en Buenos Aires (Argentina), ten a disposición de todo o público unha serie de videos didácticos para a iniciación á gaita galega, tanto a nivel técnico como de repertorio. Moi recomendado.

Audiovisual didáctico de baile galego online

O mestre de baile e música tradicional Luís Prego, realizou un proxecto diario de ensinanza de baile tradicional de forma gratuita, a través de gravacións audiovisuais. Tedes á vosa disposición 366 puntos e 2 paseos divididos por niveis de dificultade.

Espero que vos serva para facer algo máis amena esta espera. E xa que non nos deixan darnos as mans, nin abrazos nin bicos, mándovos un choque de pes.

Isidro Vidal